Cin Awara Na Taimakawa Wajen Rage Hawan Jini  —Likita

Wani likita mai suna Ahmed MS ya bayyana cewa cin awara na iya taimakawa wajen rage tashin hawan jini da kuma daidaita bugawar jinin mutum.

Likitan, wanda ke wallafa bayanai kan kiwon lafiyar ɗan Adam, ya ce hawan jini na faruwa ne idan gwaji ya nuna bugawar jini ya haura 140/90, lamarin da ke iya janyo matsaloli masu tsanani ga lafiyar mutum.

Jami’an Ƴan Sanda Sun Ƙwace Babura 104 A Kano

A cewarsa, cutar hawan jini na daga cikin manyan cututtukan da ke iya haddasa bugun zuciya, shanyewar ɓangaren jiki da kuma lalacewar kwakwalwa, musamman idan ba a gano ta da wuri ba.

Likita Ahmed ya ce awara na ɗauke da sinadarai masu amfani da ke taimakawa wajen rage tashin jini, tare da ƙarfafa garkuwar jiki.

Baya ga cin awara, ya lissafa wasu hanyoyi guda biyar da ya ce na taimakawa wajen rage haɗarin kamuwa da hawan jini ko rage tasirinsa ga masu fama da cutar.

Hanyoyin rage hawan jini, a cewar likitan

1. Yawaita cin kayan lambu da abinci na tsirrai

Ya ce ya dace a rika yawan cin ganyayyaki, kayan lambu da abinci masu sinadarin plant-based protein kamar wake da waken soya, saboda suna taimakawa wajen daidaita bugawar jini.

2. Rage cin gishiri

A cewarsa, yawan cin gishiri na ƙara sinadarin sodium a jiki, wanda ke haddasa tashin jini.

3. Rage kiba

Likitan ya ce rage kiba da kashi 5 zuwa 10 cikin 100 na iya rage haɗarin shanyewar ɓangaren jiki da kusan kashi 30.

4. Motsa jiki akai-akai

Ya ba da shawarar yin motsa jiki na akalla minti 150 a kowane mako, musamman tafiya da sauran ayyukan jiki masu sauƙi.

5. Rage damuwa

Ya ce damuwa na taka rawa wajen tashin jini, don haka ya kamata mutum ya rika yin abubuwan da ke kwantar da hankali kamar yawo, hira da abokai da hutawa.

Likitan ya ƙara da cewa bin wadannan shawarwari na iya taimakawa wajen kare kai daga kamuwa da hawan jini da kuma rage matsalolin da ke tattare da cutar.

PREMIUM TIMES