ICPC Ta Gurfanar Da Na Hannun Daman El-rufai A Kotu Kan Zargin Sama Da Faɗi Da Naira Biliyan 311

Jami’an ‎Hukumar Yaƙi da Cin Hanci da Rashawa (ICPC) sun gurfanar da Amadu Sule, Daraktan Kamfanin TMDK Terminal Limited, a gaban kotu kan zargin sama da faɗi da kuɗi har Naira biliyan 311.

LEADSHIP ta‎ ruwaito cewa Sule na da alaƙa da tsohon gwamnan Jihar Kaduna, Nasir El-Rufai.

‎Ana tuhumarsa a kan laifuka guda biyar da suka shafi satar kuɗi da kuma riƙe kuɗaɗen da ake zargin na zamba ne, wanda ya saɓa dokar Kuɗi ta 2022.

‎ICPC ta ce Sule ya mallaki sama da naira biliyan 311 da aka tura ta asusun bankuna kamar Fidelity Bank, Stanbic IBTC da Providus Bank.

‎An ruwaito cewa kuɗaɗen sun fito ne daga kamfanoni irin su INT Towers Limited, IHS Nigeria Ltd, IHS Towers NG Ltd da Boaz Commodities Limited, domin samar da kayayyakin mai.

‎Hukumar ta ce Sule “ya kamata ya san” cewa kuɗaɗen haram ne.

‎Har ila yau, an zarge shi da kamfanin TMDK Terminal Limited da riƙe harajin biliyoyin kuɗaɗe.

‎Kotun ta ɗage shari’ar zuwa ranar 15 ga watan Janairu domin sauraron roƙon bayar da belin Sule.

‎Shari’ar ta jawo hankalin jama’a saboda alaƙar kamfanin TMDK Terminal Limited ke da ita da iyalan El-Rufai.